و او سفيد ريش و خير انديش لر كوردو كى مصلحتدن عدول و نكولى دين و دولتلرينه سزا كورميوب بو مقوله برامور ديده و صاحب تجربه موفق بالموهبة صاحب سعادتك توسط و توجه شريف لرى ايله بو مصلحت خير انجام اتمام و اختتام بولمسنه بذل همت و اغتنام وقت فرصته سعى و دقّت بيوريله . فى الحقيقة مشار اليه حضرت لرى اغراض و علل دنيويه دن مبرا و امراض تعصب و تعدى دن معرا . دوستلق و دشمنلكه قادر خرق و التيام امرنده كار آزموده و ماهر دولتلو و عظمتلو و شوكتلو پادشاهمزك حسن اعتماد همايون لرينه مظهر و نظر التفات سعادت مقرون لرينه منظر واقع اولمش وزير پير روشن ضمير لرى اولوب عامهء امور دين و دولت و كافهء مهمات ملك و ملت يد ظفر تأييد لرينه مفوص و مسلّم اولمغله بو شغل عظيم و امر مهم واجب التقديمك دخى حل و عقدى خاصه طرف همايون پادشاهيدن انلرك راى عقده گشالرينه تفويض و تقليد اولنمشدر . ان شاء اللّه تعالى دولت طرفينه نافع و سودمند كورد كلرى احوال نفس الامره موافق و صلح و صلاح با بنده دستور العمل او لمقلغه لايق در . چون كه بو آستان سعادت آشيان ايله ما بينده صلح و آشتى و محبت و يك جهتى خصوصنه ميل و توجه بيورلمش لايق دولت و موافق كار و مصلحت بو فهم اولنور كه مقصود و مراد اولنان امور و قضايا و حصولى ما فى الفؤاد اولان كار و مدعى بر صورت خوب ايله ترتيب و بر هيئت مرغوب اوزره تركيب اولنه كه عز حضور سعادت موفور پادشاهى يه عرض وانها اولنديغى وقت دائرهء رضاى شريف لرينه داخل و آيينهء حسن قبوله مقابل اولمغه صلاحيتى اوله . الحمد للّه تعالى روم ايلى جانب لرنده بوقدر مد تدنبر و جادهء اطاعت و انقياد دن خروج و پايهء بغى و طغيانه عروج ايدن كفره قرللرى آستان دوستان نواز پادشاهى متابعت و كالاول عرض عبوديت و اطاعت ايتملريله جمله سنك اطاعت و انقياد لرى پيشگاه سرير عالم مصير خداوندگارى ده حيّز قبوله موصول و هربرى و اصل انواع مرام و مسئول اولمشدر جمله دن عامهء كفره قرال لرينك زبده سى و نامدارى و بحر و